បច្ចេកទេសលំនឹងផ្លូវចិត្ត៖ បច្ចេកទេសផ្តោតលើបច្ចុប្បន្នភាព ៥ ៤ ៣ ២ ១

បច្ចេកទេសលំនឹងផ្លូវចិត្ត៖ ផ្តោតលើបច្ចុប្បន្នភាព ៥-៤-៣-២-១

ស្របពេលដែលប្រទេសជាតិយើងកំពុងរងការវាយប្រហារ និងមានស្ថានភាពលំបាក ខ្ញុំដឹងថាអារម្មណ៍តានតឹង (Stress) និងការថប់បារម្ភ គឺជាអារម្មណ៍ធម្មតាដែលកើតមានសម្រាប់មនុស្សគ្រប់គ្នា។ អត្ថបទនេះនឹងចែករំលែកវិធីសាស្ត្រងាយៗដើម្បីថែទាំសុខភាពផ្លូវចិត្តរបស់អ្នក។

"នៅក្នុងអំឡុងពេលដែលលំបាកបែបនេះ ការថែទាំសុខភាពផ្ទាល់ខ្លួន ទាំងសុខភាពរាងកាយ និង សុខភាពផ្លូវចិត្ត ពិតជាមានសារៈសំខាន់ខ្លាំងណាស់។ មានរបៀបជាច្រើនក្នុងការថែទាំខ្លួនឯង ដោយក្នុងនោះ ការបរិភោគឱ្យបានទៀងទាត់ សម្រាកឱ្យបានគ្រប់គ្រាន់ គឺជារឿងចាំបាច់ដែលត្រូវធ្វើ ប៉ុន្តែមានពេលខ្លះដោយសារតែស្ថានភាព និងអារម្មណ៍របស់យើងពេលខ្លះនៅតែបន្តខ្វាយខ្វល់។"

អារម្មណ៍ខ្វាយខ្វល់នេះ មានពេលខ្លះធ្វើឱ្យមនុស្សយើងបាយមិននឹក ទឹកមិនស្រេកក៏ថាបាន។ មានវិធីសាស្រ្តមួយ ដែលលោកអ្នកអាចប្រើប្រាស់ដើម្បីជួយឱ្យអារម្មណ៍របស់លោកអ្នកមានស្ថានភាពបានល្អប្រសើរឡើងវិញ លំហាត់នោះហៅថា ”បច្ចេកទេសផ្តោតលើបច្ចុប្បន្នភាព ៥ ៤ ៣ ២ ១”។

👆 ចុចដើម្បីទស្សនាវីដេអូណែនាំការអនុវត្ត

ហេតុអ្វីត្រូវប្រើប្រាស់បចេ្ចកទេសនេះ?

បច្ចេកទេសនេះត្រូវបានបង្កើតឡើងដោយ Betty Alice Erickson។ វាជាបច្ចេកទេសលំនឹងផ្លូវចិត្តដែលអាចជួយឱ្យអារម្មណ៍របស់យើងមានភាពនឹងនរឡើងវីញ បន្ទាប់ពីជួបហេតុការណ៍អកុសលផ្សេងៗ។ អត្ថប្រយោជន៍មានដូចជា៖

• បង្វែរអារម្មណ៍ចេញពីគំនិតដែលពិបាកចិត្ត ហើយត្រលប់មកពេលបច្ចុប្បន្នវិញ។
• ធ្វើអោយអារម្មណ៍ និងរាងកាយរបស់អ្នកស្ងប់ចុះមកវិញ។
• រហ័ស និងអាចប្រើប្រាស់បានគ្រប់កាលៈទេសៈ (ពិសេសពេលមានការភ័យស្លន់ស្លោ ឬតានតឹងខ្ពស់)។

គោលការណ៍នៃញាណទាំង ៥

វិធីសាស្ត្រនេះប្រើប្រាស់ញាណទាំង ៥ របស់មនុស្សយើងក្នុងការនាំខ្លួនយើងឱ្យត្រលប់មកនៅបច្ចុប្បន្នវិញ៖

៥

ចក្ខុ (ភ្នែក) មើលឃើញរបស់ ៥ យ៉ាងនៅជុំវិញខ្លួន (ពណ៌, រូបរាង, ទំហំ)។

៤

កាយ (រាងកាយ) ដឹងពីការប៉ះចំនួន ៤ យ៉ាង (សម្លៀកបំពាក់, ជើងប៉ះដី)។

៣

សោត (ត្រចៀក) ស្តាប់ឮសំឡេង ៣ យ៉ាងនៅជុំវិញ។

២

ឃាន (ច្រមុះ) ដឹងក្លិន ២ យ៉ាងនៅជុំវិញ។

១

ជីវ្ហា (មាត់) ដឹងរសជាតិ ១ យ៉ាងនៅក្នុងមាត់។

ការអនុវត្តជាក់ស្តែង

សូមសម្រួលឥរិយាបថឱ្យមានភាពងាយស្រួល (អង្គុយ ឬដេក) ហើយដកដង្ហើមចេញចូលមួយៗ យឺតៗ...

👀 ភ្នែក៖ ក្រលេកមើលអ្វីៗនៅជុំវិញ។ រករបស់ដែលអ្នកពេញចិត្ត។ តើវាមានពណ៌អ្វី? ទំហំប៉ុណ្ណា? ... (ដកដង្ហើមវែងៗ)

✋ កាយ៖ កត់សម្គាល់អ្វីដែលប៉ះរាងកាយអ្នក។ សំលៀកបំពាក់? កៅអីដែលអ្នកអង្គុយ? ... (ដកដង្ហើមយឺតៗ)

👂 សោត៖ សម្គាល់សំឡេងជុំវិញខ្លួន។ សំឡេងខ្យល់? សំឡេងឡានម៉ូតូ? ... (ដកដង្ហើមវែងៗ)

👃 ឃាន៖ ចាប់អារម្មណ៍លើខ្យល់ដង្ហើម និងក្លិនជុំវិញខ្លួន។

👅 ជីវ្ហា៖ គ្រលៀសអណ្តាតជុំវិញមាត់ និងចាប់អារម្មណ៍ពីរសជាតិ។

ដកដង្ហើមចេញ... ដកដង្ហើមចូល... មួយៗ...

សរុបសេចក្តី

លោកអ្នកអាចប្រើប្រាស់វិធីសាស្ត្រនេះបានគ្រប់ពេលវេលា និងទីកន្លែង។ មិនចាំបាច់ទាល់តែប្រើគ្រប់ញាណទាំង ៥ នោះទេ លោកអ្នកអាចប្រើតែមួយផ្នែកដូចជា ការមើលជុំវិញខ្លួន ឬការក្តាប់ដៃឱ្យណែន ក៏អាចជួយឱ្យលោកអ្នកត្រលប់មកបច្ចុប្បន្នភាព និងកាត់បន្ថយភាពតានតឹងបានដែរ។

ឯកសារយោង (APA 7th Edition)៖

Micallef, C. (2023, May 29). Managing stress and anxiety: The 54321 mindfulness grounding practice. Now About Meditation. https://www.nowaboutmeditation.com/p/54321-mindfulness-grounding-practice