សារខ្លីពីអង្គការសុខភាពពិភពលោក៖ សម្រាប់ថែទាំសុខភាពខួរក្បាល

សម្រាកជាផ្នែកមួយនៃការថែទាំសុខភាពខួរក្បាល

ដោយ៖ ភុល សុភារិទ្ធ

ថ្ងៃទី០៦ ខែវិច្ឆិការ ឆ្នាំ ២០២៥

ផ្នែកទី១៖ សេចក្តីផ្តើម

អត្ថបទនេះ នឹងចែករំលែកចំណេះដឹងជាមួយនឹងអ្នកទាំងអស់គ្នាទាក់ទង ក្នុងការថែទាំសុខភាព​ខួរក្បាល​របស់​លោកអ្នក។ ដើម្បីរកប្រាក់ចំណូលបានច្រើនមនុស្សយើងត្រូវខិតខំធ្វើការ មិនថាថ្ងៃ មិនថាយប់ មានអ្នកខ្លះ លើកទ្រឹស្តីមួយឡើងថា ដើម្បីមានលុយចាយវាយហ៊ឺហាត្រូវខិតខំធ្វើការដោយមិនមានពេលសម្រាកនោះទេ។

"ថាតើនឹងមានរឿងអ្វីកើតឡើងដែរ ប្រសិន​បើ​ខួរក្បាលរបស់មនុស្សយើងមិនមានពេលសម្រាក"

មុននឹងលោកអ្នក អនុវត្តតាមទស្សនៈខាងលើនេះ សូមអានអត្ថបទនេះជាមុនសិន។

សូមបញ្ជាក់បន្តិច៖ អត្ថបទនេះធ្វើឡើងដោយដកស្រង់ចេញពីសារខ្លីមានក្នុង Facebook របស់អង្គការ WHO ប្រទេសភីលីពីន។ លោកអ្នកអាចចូលមើល តំណភ្ជាប់សម្រាប់អត្ថបទដើម ។

ផ្នែកទី២៖ ការពិតទាក់ទងនឹងខួរក្បាល

លោកអ្នកត្រូវដឹង ខួរក្បាលរបស់មនុស្សយើងមិនដែលបញ្ឈប់ការធ្វើការងាររបស់ខ្លួននោះទេ បើទោះបីជារាងកាយរបស់យើងនឿយហត់អស់កំលាំងយ៉ាងណាក៏ដោយ។ ប៉ុន្តែការដែលមនុស្សយើងបន្តគិតនេះគិតនោះ ហើយមិនមានទទួលបានការសម្រាកខ្លះ នោះអ័រម៉ូននៃភាពតានតឹងចិត្ត (Stress) នឹងកើនឡើង ដែលដាក់បន្ទុកដល់បេះដូង និងសម្ពាធក្នុងសរសៃឈាមរបស់មនុស្សយើងជាបន្តបន្ទាប់។

សូមបញ្ជាក់៖ ការសម្រាកត្រង់ចំណុចនេះមិនមែនមានន័យថា ឱ្យមនុស្សយើងឈប់ធ្វើការងារអ្វីទាំងអស់នោះទេ។ លោកអ្នកគួរតែមានពេលវេលាខ្លះសម្រាប់ខ្លួនឯងខ្លះ ដូចជា៖

• ធ្វើដំណើរកំសាន្ត (សាកថ្មជីវិត)
• គេងឱ្យបានគ្រប់គ្រាន់ (ចន្លោះពី៧ម៉ោង ទៅ ៩ម៉ោងច្រើនបំផុត)
• ហាត់ប្រាណ ឬធ្វើសមាធិ

ដើម្បីកុំឱ្យចិត្តយើងនេះចេះតែខ្វាយខ្វល់ច្រើនពេក ទុកពេលខ្លះសម្រាប់សម្រាក។

ពេលមនុស្សយើងមានភាពតានតឹងផ្លូវចិត្ត (Stress) វានឹងបង្កជាការឈឺចាប់ដល់រាងកាយរបស់យើង។ ហើយការដែលមានភាពតានតឹងចិត្តបន្តរ៉ាំរៃ (Chronic Stress) ជាប់ក្នុងខ្លួន នោះក៏នឹងធ្វើឱ្យបេះដូងលោតញាប់ខុសធម្មតា ហើយបង្កឱ្យសរសៃឈាមឡើងតឹងណែន។ យូរៗទៅ ធ្វើឱ្យសម្ពាធឈាមរបស់លោកអ្នកឡើងខុសធម្មតា ហើយបង្កជាគ្រោះថ្នាក់ជំងឺដាច់សរសៃឈាមក្នុងខួរក្បាល និងជំងឺបេះដូង។

សូមបញ្ជាក់៖ មនុស្សយើងគ្រប់គ្នាតែងតែមានភាពតានតឹងចិត្ត ដោយជៀសមិនរួច គ្រាន់តែថាកុំបណ្តោយឱ្យភាពតានតឹងចិត្តនោះ នៅជាមួយលោកអ្នកយូរពេក។ សូមរកពេលខ្លះទំលាក់ភាពតានតឹងក្នុងចិត្តរបស់លោកអ្នកចោលខ្លះទៅបើសិនជាអាច។

ចុះបើខួរក្បាលរបស់មនុស្សយើងទទួលរងសម្ពាធវិញ តើនឹងមានរឿងអ្វីកើតឡើង?

ពេលខួរក្បាលរបស់មនុស្សយើងទទួលរងសម្ពាធធ្ងន់ធ្ងរ វានឹងបង្កឱ្យសម្ពាធឈាមឡើងខ្ពស់ផងដែរ។ សម្ពាធឈាមឡើងខ្ពស់ អាចធ្វើឱ្យសរសៃឈាមតូចក្នុងខួរក្បាលរបស់លោកអ្នកចុះខ្សោយ ហើយនៅពេលសរសៃតូចៗនោះស្ទះ ឬខូចខាត វាបណ្តាលឱ្យផ្នែកខ្លះនៃខួរក្បាលលែងដំណើរការ។​ នេះហើយជាមូលហេតុធ្វើឱ្យមនុស្សយើង កើតមានជំងឺដាច់សរសៃឈាមក្នុងខួរក្បាល។

សូមចាំថា៖ ខួរក្បាលរបស់យើងទទួលរងសម្ពាធធ្ងន់ធ្ងរ គឺតាមរយៈការគិតពីនេះពីនោះច្រើន និងភាពតានតឹងចិត្តបន្តរ៉ាំរៃជាប់ជាប្រចាំជាមួយនឹងលោកអ្នក ដូចនេះហើយទើបលោកអ្នកគួរតែមានពេលខ្លះសម្រាកផងដែរ។

នៅពេលដែលលោកអ្នកអនុញ្ញាតិឱ្យខួរក្បាលរបស់លោកអ្នកបានសម្រាកខ្លះ នោះខួរក្បាលរបស់លោកអ្នកនឹង ចាប់ដំណើរការជាថ្មីឡើងវិញម្តងទៀត ហើយរាងកាយរបស់លោកអ្នកត្រលប់មកដូចប្រក្រតីវិញ។ ការគេង និងសម្រាកបានគ្រប់គ្រាន់ នឹងជួយកាត់បន្ថយភាពតានតឹង (Stress) របស់លោកអ្នក ហើយធ្វើឱ្យចង្វាក់បេះដូងលោតដូចប្រក្រតី ដែលការពារសុខភាពរាងកាយរបស់លោកអ្នកក្នុងរយៈពេលវែង។

ត្រូវការគំនិតសម្រាកអារម្មណ៍មែនទេ?

ចុចប៊ូតុងខាងក្រោម ដើម្បីទទួលបានគន្លឹះខ្លីៗ សម្រាប់ជួយសម្រាកអារម្មណ៍ បង្កើតដោយ Gemini AI។

ផ្នែកទី៣៖ សរុបសេចក្តី

ជាចុងក្រោយការថែទាំសុខភាពខួរក្បាលរបស់លោកអ្នក ប្រៀបដូចជាលោកអ្នកថែទាំសុខភាពបេះដូងរបស់ខ្លួនផងដែរ ឬអាចនិយាយម្យ៉ាងទៀតបានថា ថែទាំសុខភាពផ្លូវកាយរបស់លោកអ្នក នឹងជួយឱ្យសុខភាពផ្លូវចិត្តបានល្អប្រសើរផងដែរ។ សូមបន្តធ្វើការថែទាំទាំងសុខភាពផ្លូវកាយ ផ្លូវចិត្ត និងផ្លូវសង្គមរបស់ខ្លួនឱ្យបានល្អ ទើបយើងមនុស្សយើងទទួលបានសុខុមាលភាពល្អប្រសើរ។

គន្លឹះសំខាន់នៃតុល្យភាព

ថែទាំសុខភាពរបស់ខ្លួន មានន័យថាមនុស្សយើងព្យíesយាមស្វែងតុល្យភាពតាមរយៈមានពេលសម្រាកគ្រប់គ្រាន់ ធ្វើសកម្មភាពខាងរាយកាយផ្សេងៗ និង ទុកពេលវេលាឱ្យរាងកាយរបស់យើងជួសជុលកន្លែងដែលខូចខាតផង។

សង្ឃឹមថាអត្ថបទមួយនេះ នឹងក្លាយជាចំណេះដឹងខ្លះៗសម្រាប់លោកអ្នក ហើយចែករំលែកជាមួយនឹងអ្នកដទៃឱ្យពួកគេព្យាយាមស្វែងរកពេលវេលាខ្លះសម្រាកផងដែរ។

© ២០២៥ | រក្សាសិទ្ធិគ្រប់យ៉ាងដោយ ភុល សុភារិទ្ធ